राष्ट्रवादीच्या महिला प्रदेशाध्यक्षपदाची संधी मिळाली तर सोनं करीन

NewsZenn Mar 25, 2022 663 0

काही दिवसांपूर्वीच मनसेमधून राष्ट्रवादी काँग्रेसमध्ये आलेल्या रुपाली पाटील ठोंबरे यांनी महिला प्रदेशाध्यक्षपद सांभाळण्याची तयारी दर्शवली आहे. जर संधी मिळाली तर चांगले काम करून दाखवीन, असा विश्वासही त्यांनी व्यक्त केला.

राष्ट्रवादी काँग्रेसच्या नेत्या रूपाली चाकणकर यांनी राष्ट्रवादीच्या महिला प्रदेशाध्यक्षपदाचा बुधवारी राजीनामा दिला. रूपाली चाकणकर यांच्यावर सध्या राज्य महिला आयोगाची जबाबदारी आहे. रुपाली चाकणकर यांच्या राजीनाम्यानंतर रिक्त झालेल्या महिला प्रदेशाध्यक्षपदी कोणाची वर्णी लागणार याची सध्या चर्चा सुरू आहे.

रुपाली पाटील ठोंबरे यांनी एक व्हिडिओ प्रदर्शित केला आहे. त्यात त्या म्हणाल्या, एका व्यक्तीला दोन पदे असू नयेत म्हणून रूपाली चाकणकर यांनी प्रदेशाध्यक्षपदाचा राजीनामा दिला. राष्ट्रवादी कॉंग्रेसचं महिला प्रदेशाध्यक्षपद त्यांनी उत्तमरीत्या पेललं. त्यामुळे रुपाली चाकणकर यांच्या राजीनाम्यानंतर रिक्त झालेल्या जागेवर मला संधी मिळाली तर मी अत्यंत चांगल्या पद्धतीने काम करीन, असा विश्वास त्यांनी व्यक्त केला.

रुपाली पाटील ठोंबरे या फायरब्रँड नेत्या म्हणून ओळखल्या जातात. काही दिवसांपूर्वीच त्यांनी मनसेतून राष्ट्रवादी काँग्रेसमध्ये प्रवेश केला आहे. मनसेचा आक्रमक चेहरा म्हणून त्यांची ओळख होती. पुणे महानगरपालिकेत त्या एकदा नगरसेविका म्हणूनही निवडून आल्या आहेत. मनसेच्या पुणे शहर महिला आघाडी अध्यक्ष म्हणून देखील त्यांनी काम पाहिले आहे. त्यामुळे राष्ट्रवादी काँग्रेसच्या रिक्त झालेल्या महिला काँग्रेसच्या अध्यक्षपदाची जबाबदारी रूपाली पाटील ठोंबरे यांना मिळणार का, हे आगामी काही काळात स्पष्ट होईल.

Click Here To See More